على إثر الأحداث الأخيرة و المتعاقبة و حتى يكون موقفي متناغما مع الإرادة الشعبية و من منطلق الرجلة اللي تفرضو الحالة في البلاد توة، قررت ما يلي :

- تهييج شعري و قطع علاقتي بالحجام متاعي على خاطرو كان معلق تصويرة زعبع في حانوتو

 

- قص روابط المودة والأخوة اللي كانت تربطني بكوّاش(boulanger) الحومة لنفس الأسباب المذكورة أعلاه

 

- حرق أو على الأقل تقطيع الabonnement متاعي في النادي الرياضي إلي كنت نشجع فيه على خاطرو كيف النوادي لكل كان يناشد في زعبع بش يترشح للإنتخابات متاع 2014

 

- تكوين لجان شعبية باش نشدو العمد و المعتمدين و الولاّة و الوزرة و نربطوهم في البلفدار و نمنعو عليهم الكاكي كان لزم

 

- كل واحد إسمو زين العابدين يخدم في الحاكم و كل وحدة إسمها ليلى تخدم حجامة لازمهم يبدلو اساميهم وإلا يبدلو القلم و مانخليوهمش يتعرفو على بعضهم

 

- إلي عندو حاجة لونها بنفسجي (سروال، طربوشة، صندال ولا حتى كلصيطة) يا حبذا يغطسها في الجافال وإلا يهز يصبغها

 

- و أخيرا، قررت باش نتبرى من أمي خاطر نتذكر وانا صغير مشيت معاها بش تنتخب ياخي ريتها حطت الورقة الحمراء في الصندوق

و هكا إخواني و أخواتي نكون قطعت تماما مع الحقبة الظلامية متاع زعبع و التجمع و عاونت على إرساء الديمقراطية و الحرية و التعددية

...

 

أما ستنا ستنا ... كايني نسيت حاجة... موش اللي كان صاير لكلو كنت نتفرج فيه و ساكت و عمرني ما حليت فمي و قلت لا؟؟؟

مالا تعرفوشي كيفاش؟ نلغي القرارت إلي خذيتها جملة، و هاني بش نمشي نعطي لروحي طريحة بالشلاكة على ترمتي و نرقد

 

أنستو